** শিব গীতা **5 রামায় বরপ্রদানং

সূত উবাচ ||

 অথ প্রাদুরভূত্তত্র হিরণ্ময়রথো মহান্ |

 অনেকদিব্যরত্নাংশুকির্মীরিতদিগন্তরঃ || ১||

 নদ্যুপান্তিকপঙ্কাঢ্যমহাচক্রচতুষ্টয়ঃ |

 মুক্তাতোরণসংযুক্তঃ শ্বেতচ্ছত্রশতাবৃতঃ || ২||

 শুদ্ধহেমখলীনাঢ্যতুরঙ্গগণসংযুতঃ |

 শুক্তাবিতানবিলসদূর্ধ্বদিব্যবৃষধ্বজঃ || ৩||

 মত্তবারণিকায়ুক্তঃ পট্টতল্পোপশোভিতঃ |

 পারিজাততরূদ্ভূতপুষ্পমালাভিরঞ্চিতঃ || ৪||

 মৃগনাভিসমুদ্ভূতকস্তূরিমদপঙ্কিলঃ |

 কর্পূরাগধূপোত্থগন্ধাকৃষ্টমধুব্রতঃ || ৫||

 সংবর্তঘনঘোষাঢ্যো নানাবাদ্যসমন্বিতঃ |

 বীণাবেণুস্বনাসক্তকিন্নরীগণসংকুলঃ || ৬||

 এবং দৃষ্ট্বা রথশ্রেষ্ঠং বৃষাদুত্তীর্য শংকরঃ |

 অম্বয়া সহিতস্তত্র পট্টতল্পেঽবিশত্তদা || ৭||

 নীরাজনৈঃ সুরস্ত্রীণাং শ্বেতচামরচালনৈঃ |

 দিব্যব্যজনপাতৈশ্চ প্রহৃষ্টো নীললোহিতঃ || ৮||

 ক্বণৎকঙ্কণনিধ্বানৈর্মংজুমঞ্জীরসিঞ্জিতৈঃ |

 বীণাবেণুস্বনৈর্গীতৈঃ পূর্ণমাসীজ্জগত্ত্রয়ম্ || ৯||

 শুককেকিকুলারাবৈঃ শ্বেতপারাবতস্বনৈঃ |

 উন্নিদ্রভূষাফণিনাং দর্শনাদেব বর্হিণঃ || ১০||

 ননৃতুর্দর্শয়ন্তঃ সর্বাংশ্চন্দ্রকান্কোটিসংখ্যয়া |

 প্রণমন্তং ততো রামমুত্থাপ্য বৃষভধ্বজঃ || ১১||

 আনিনায় রথং দিব্যং প্রহৃষ্টেনান্তরাত্মনা |

 কমণ্ডলুজলৈঃ স্বচ্ছৈঃ স্বয়মাচম্য যত্নতঃ || ১২||

 সমাচম্যাথ পুরতঃ স্বাংকে রামমুপানয়ৎ |

 অথ দিব্যং ধনুস্তস্মৈ দদৌ তূণীরমক্ষয়ম্ || ১৩||

 মহাপাশুপতং নাম দিব্যমস্ত্রং দদৌ ততঃ |

 উক্তশ্চ তেন রামোঽপি সাদরং চন্দ্রমৌলিনা || ১৪||

 জগন্নাশকরং রৌদ্রমুগ্রমস্ত্রমিদং নৃপ |

 অতো নেদং প্রয়োক্তব্যং সামান্যসমরাদিকে || ১৫||

 অন্যন্নাস্তি প্রতীঘাতমেতস্য ভুবনত্রয়ে |

 তস্মাৎপ্রাণত্যয়ে রাম প্রয়োক্তব্যমুপস্থিতে || ১৬||

 অন্যদৈত্যৎপ্রয়ুক্তং তু জগৎসংক্ষয়কৃদ্ভবেৎ |

 অথাহূয় সুরশ্রেষ্ঠান্ লোকপালান্মহেশ্বরঃ || ১৭||

 উঅবাচ পরমপ্রীতঃ স্বং স্বমস্ত্রং প্রয়চ্ছত |

 রাঘবোঽযং চ তৈরস্ত্রৈ রাবণং নিহনিষ্যতি || ১৮||

 তস্মৈ দেবৈরবধ্যৎবমিতি দত্তো বরো ময়া |

 তস্মাদ্বানরতামেত্য ভবন্তো যুদ্ধদুর্মদাঃ || ১৯||

 সাহায়্যমস্য কুর্বন্তু তেন সুস্থা ভবিষ্যথ |

 তদাজ্ঞাং শিরসা গৃহ্য সুরাঃ প্রাঞ্জলয়স্তথা || ২০||

 প্রণম্য চরণৌ শম্ভোঃ স্বং স্বমস্ত্রং দদুর্মুদা |

 নারায়ণাস্ত্রং দৈত্যারিরৈন্দ্রমস্ত্রং পুরংদরঃ || ২১||

 ব্রহ্মাপি ব্রহ্মদণ্ডাস্ত্রমাগ্নেয়াস্ত্রং ধনংজয়ঃ |

 যাম্যং যমোঽপি মোহাস্ত্রং রক্ষোরাজস্তথা দদৌ || ২২||

 বরুণো বারুণং প্রাদাদ্বায়ব্যাস্ত্রং প্রভঞ্জনঃ |

 কৌবেরং চ কুবেরোঽপি রৌদ্রমীশান এব চ || ২৩||

 সৌরমস্ত্রং দদৌ সূর্যঃ সৌম্যং সোমশ্চ পার্বতম্ |

 বিশ্বেদেবা দদুস্তস্মৈ বসবো বাসবাভিধম্ || ২৪||

 অথ তুষ্টঃ প্রণম্যেশং রামো দশরথাত্মজঃ |

 প্রাঞ্জলিঃ প্রণতো ভূৎবা ভক্তিয়ুক্তো ব্যজিজ্ঞপৎ || ২৫||

 শ্রীরাম উবাচ ||

 ভগবান্মানুষেণৈব নোল্লঙ্ঘ্যো লবণাম্বুধিঃ |

 তত্র লঙ্কাভিধং দুর্গং দুর্জয়ং দেবদানবৈঃ || ২৬||

 অনেককোটয়স্তত্র রাক্ষসা বলবত্তরাঃ |

 সর্বে স্বাধ্যায়নিরতাঃ শিবভক্তা জিতেন্দ্রিয়াঃ || ২৭||

 অনেকমায়াসংযুক্তা বুদ্ধিমন্তোঽগ্নিহোত্রিণঃ |

 কথমেকাকিনা জেয়া ময়া ভ্রাত্রা চ সংযুগে || ২৮||

 শ্রীমহাদেব উবাচ ||

 রাবণস্য বধে রাম রক্ষসামপি মারণে |

 বিচারো ন ৎবয়া কার্যস্তস্য কালোঽযমাগতঃ || ২৯||

 অধর্মে তু প্রবৃত্তাস্তে দেবব্রাহ্মণপীডনে |

 তস্মাদায়ুঃক্ষয়ং যাতং তেষাং শ্রীরপি সুব্রত || ৩০||

 রাজস্ত্রীকামনাসক্তং রাবণং নিহনিষ্যসি |

 পাপাসক্তো রিপুর্জেতুঃ সুকরঃ সমরাঙ্গণে || ৩১||

 অধর্মে নিরতঃ শত্রুর্ভাগ্যেনৈব হি লভ্যতে |

 অধীতধর্মশাস্ত্রোঽপি সদা বেদরতোঽপি বা || ৩২||

 বিনাশকালে সম্প্রাপ্তে ধর্মমার্গাচ্চ্যুতো ভবেৎ |

 পীড্যন্তে দেবতাঃ সর্বাঃ সততং যেন পাপিনা || ৩৩||

 ব্রাহ্মণা ঋষয়শ্চৈব তস্য নাশঃ স্বয়ং স্থিতঃ |

 কিষ্কিংধানগরে রাম দেবানামংশসম্ভবাঃ || ৩৪||

 বানরা বহবো জাতা দুর্জয়া বলবত্তরাঃ |

 সাহায়্যং তে করিষ্যন্তি তৈর্বধ্বা চ পয়োনিধিম্ || ৩৫||

 অনেকশৈলসম্বদ্ধে সেতৌ যান্তু বলীমুখাঃ |

 রাবণং সগণং হৎবা তামানয় নিজাং প্রিয়াম্ || ৩৬||

 শস্ত্রৈর্যুদ্ধে জয়ো যত্র তত্রাস্ত্রাণি ন যোজয়েৎ |

 নিরস্ত্রেষ্বল্পশস্ত্রেষু পলায়নপরেষু চ || ৩৭||

 অস্ত্রাণি মুঞ্চন্ দিব্যানি স্বয়মেব বিনশ্যতি |

 অথবা কিং বহূক্তেন ময়ৈবোৎপাদিতং জগৎ || ৩৮||

 ময়ৈব পাল্যতে নিত্যং ময়া স.ম্হ্রিয়তেঽপি চ |

 অহমেকো জগন্মৃত্যুর্মৃত্যোরপি মহীপতে || ৩৯||

 গ্রসেঽহমেব সকলং জগদেতচ্চরাচরম্ |

 মম বক্ত্রগতাঃ সর্বে রাক্ষসা যুদ্ধদুর্মদাঃ || ৪০||

 নিমিত্তমাত্রং ৎবং ভূয়াঃ কীর্তিমাপ্স্যসি সংগরে || ৪১||

 ইতি শ্রীপদ্মপুরাণে উপরিভাগে শিবগীতাসূপনিষৎসু

 ব্রহ্মবিদ্যায়াং যোগশাস্ত্রে শিবরাঘবসংবাদে